Tres d’acabar la so primer temporada hai trés meses, vuelve a TPA Xuntanza, un programa que, nes sos pallabres, «celebra la música a traviés de quien la vive, la reinventa y la tresmite«. Esta temporada nueva va emitise hasta final d’añu los sábados a les 22.30h y el primer episodiu va tar conducíu pol multiinstrumentista y doctor en Musicoloxía Héctor Braga.
Nesti capítulu van apaecer la Orquesta de Cámara Solidaria (OCAS) -enantes, Orquesta de Cámara de Siero-, el Coro Santiaguín, los míticos Nuberu, la banda celta Guieldu, y l’intérprete de tonada Álvaro Fernández Conde. Tamién van tratase otres cuestiones rellacionaes cola identidá y historia asturiana como son la bandera, l’himnu, la emigración, l’Estatutu d’Autotonomía o Cuadonga.
La primer temporada de Xuntanza tuvo presentada por Pau Santirso; Vicente Díaz; Héctor Braga, que fizo un especial dedicáu a l’asturianada; Esther Fonseca, con un episodiu enfotáu na mocedá; y Silvia Quesada, que presentó’l capítulu de los sones nel Occidente. Como espón Zebrastur -productora del programa- en nota de prensa, «la celebración de l’asturianía» ye’l filu conductor del primer capítulu d’esta temporada nueva.
Suscríbite a les nuestres novedaes
