Si’l sector musical asturianu s’organiza y la xente apoya, vien de xuru la victoria. Esti llunes 22 el plenu municipal de Tinéu, nuna sesión estraordinaria, aprobó caltener la Escuela Municipal de Música colos votos a favor de PSOE, IU y Vox. La movilización popular, les crítiques d’una montonera persones venceyaes a la cultura y los desalcuentros ente’l PP y Vox, fixeron que’l partíu d’ultraderecha abandonara’l gobiernu y los conservadores quedaren solos na posición qu’aprobara’l mayu pasáu y que suponía la eliminación de les places de profesoráu y el zarru d’esti serviciu públicu.
D’esta manera, esta escuela municipal de música con 30 años d’existencia y un bon númberu d’alumnáu, va siguir ufriendo’l so serviciu educativu y cultural en Tinéu y el profesoráu va poder caltener el so puestu de trabayu. Ente’l personal docente alcuéntrase David Varela, que foi ún de los músicos que más bregó escontra’l zarru de la escuela y que yá participara activamente en movilizaciones como les de Música n’asturianu SÍ en Xixón.
«La Cai Mayor quedó pequeña ente la marea de sofitu recibío. Gracies vecinos, families, músicos de toa Asturies, artistes locales, asociaciones musicales del Conceyu, comerciantes, hostelería, sindicatos, autoridaes, trabayaores del ayuntamientu, mayestres, alumnáu de múltiples escueles… tol xentíu qu’alzasteis la voz escontra’l pieslle d’un serviciu públicu con casi 30 años d’hestoria. Gracies a toes por acompañanos, por nun callar ante una decisión inxusta del equipu de gobiernu local, algamada con falsedá, imposición y ensin diálogu, cola escusa d’un cambiu de xestión y mazcarando una privatización na solombra», foron les pallabres que Varela escribió nes sos redes sociales tres de la manifestación en rechazu del zarru de la escuela. Un mensaxe qu’agora amplifícase gracies a esta victoria pa la música’l país.
Semeya de la movilización estrayía del Instagram de David Varela
Suscríbite a les nuestres novedaes
