El vienres pasáu Siero acoyó’l XVIII Certame de Cancios de Chigre, un eventu qu’organiza Amigos del Roble y que tien l’enfotu de «recuperar l’espíritu daquelles tertulies que s’entamaben alredor de la sidra en La Pola Siero». Tres de la participación l’añu pasáu de la conseyera de Cultura, Política Llingüística y Deporte, Vanessa Gutiérrez, esti añu’l certame dio un pasu más na so intención de qu’haiga representación institucional nél: asistieron el presidente asturianu, Adrián Barbón, y l’ex presidente cántabru, Miguel Ángel Revilla. Esti últimu amás recibió la insignia d’honor pol so «apueste nidiu y respetuosu pola tradición oral y la identidá cultural», como desplicó Miguel Ánxel Montenegro, organizador del certame.
«Revilla canta asturianada, ye del Sporting, asiduu a les grandes fiestes del país y siempre fala bien de la nuesa tierra. Nun ye una cuestión política sinón de compromisu», afirmó’l presidente d’Amigos del Roble nuna entrevista fecha en MUSICASTURIANA.COM la selmana pasada. Asina ye como l’ex fundador del Partido Regionalista de Cantabria foi distinguíu en La Pola y aprovechó la ocasión pa cantar dalguna de les pieces recoyíes nel cancioneru del qu’Amigos del Roble editó 2000 exemplares. A la cita sumóse-y Barbón, faciendo que seya la primer vegada qu’un presidente asturianu asiste a un eventu que lleva faciéndose cuasi dos décades.
Nesta XVIII edición del Certame de Cancios de Chigre participaron un total de dieciséis tertulies que tuvieron cantando per quince chigres de La Pola. D’esa manera medró en cantidá la xente que participó nesti alcuentru que reivindica «una manifestación tan asturiana y guapa como ye la de cantar nos chigres, dalgo que taba perdiéndose, bien por “esnobismu” o bien por repunancia y falta de respetu pola identidá de nueso», como desplicó Montenegro.
Suscríbite a les nuestres novedaes
