El programa radiofónicu dedicáu a la música d’espresión asturiana, Al Son, va continuar emitiéndose esti 2026 en RPA tolos sábados de 22h a 23h. Dirixíu y presentáu por Xune Elipe, nesti espaciu danse cuenta de toles novedaes, producciones, publicaciones, eventos y noticies xeneraes pola escena de la música asturiana, convirtiéndose nel portavoz de la mesma. Un espaciu d’alcuentru ente intérpretes, programadores y aficionaos, que con voluntá de serviciu públicu informó sistemáticamente del so desarrollu.
Na tercer temporada recién acabada fixéronse más d’una trentena d’entrevistes a distintos actores de la música del país (músicos, asociaciones, programadores, etc), informando puntualmente de toles sos actividaes; informóse exhaustivamente de la práctica totalidá de festivales, alcuentros y demás eventos que tuvieron como protagonista a la música asturiana; tamén de munchos conciertos y actuaciones protagonizaes por grupos y solistes fechos en pequeños llocales o llugares alloñaos de los avezaos.
Tamién contactóse cola delegación asturiana nel Festival Intercélticu de Lorient (Bretaña) pa conocer cómo taba siendo’l so desarrollu y participación; tratáronse absolutamente toles novedaes discográfiques producíes a lo llargo del añu —más d’una cincuentena—, en cualquiera de los sos formatos (físicu, dixital, audiovisual); y ufiertáronse dellos programes especiales dedicaos monográficamente a temes como la música del Navia-Eo, les grabaciones en directo feches por grupos de música asturiana o los soníos indies n’asturianu.
L’oxetivu de la cuarta temporada qu’entama esti sábadu 3 ye siguir informando del día a día de la música asturiana, cola mesma voluntá de serviciu públicu; aumentar la so incidencia social, con mayor presencia nes redes sociales y tresformalu nel referente de la música del país a nivel mediáticu.
Suscríbite a les nuestres novedaes
