La ilesia de Piedras Blancas va acoyer el próximu sábadu 30 de payares l’actu d’entrega del premiu «Gaita de Oro» qu’otorga la Banda de Gaites Castrillón. Esti añu, Mariluz Cristóbal Caunedo ye la ganadora del gallardón pol so «estensu y comprometíu llabor cola cultura asturiana al traviés de la música durante más de cincuenta años de carrera, asina como pola so investigación etnográfica».
Mariluz Cristóbal Caunedo (Tinéu, 1948) ye la gran cantadora d’asturianada. Dempués de dalgunes grabaciones nel entamu de la so carrera como campeona de concursos de tonada y de la Misa asturiana de gaita que publicó en 1998 con José Antonio García Suárez “El Gaiteru de Veriña”, asoleyó Onde la ñublina posa, un discu imprescindible na discografía moderna del xéneru. Años dempués aportó Cantar de Seronda (2005) y, en 2012, Cancios y asturianaes. La so voz suena, tamién, nos trabayos d’otros artistes y coleutivos: Muyeres, Rodrigo Cuevas, Hevia… Na memoria sensorial de tola xente qu’ama la tonada resuenen el raigañu del so timbre, y la so fuercia y sensibilidá inconfundibles.
Suscríbite a les nuestres novedaes
