La Biblioteca Pública Xovellanos, asitiada en Xixón, inaugura esta tarde a les 19h la esposición La canción asturiana en discos de 78 rpm por cuenta de la celebración del Día de Santa Cecilia -patrona de la música-. La presentación va cuntar cola presencia de la conseyera de Cultura, Política Llingüística y Deporte Vanessa Gutiérrez y Fernando García Albella, director de la biblioteca. Nella úfrese una esbilla mui amplia de cantadores que grabaron na época dorada de l’asturianada, amás d’una representación de les principales partitures que, «dende l’ámbitu denomináu cultu, dieron sustentu al xéneru de la canción asturiana», y dellos códigos QR que permiten al públicu sentir dalgunes d’estes grabaciones históriques. La esposición va durar hasta’l 15 d’avientu y yá tuvo disponible na Biblioteca d’Asturies Ramón Pérez de Ayala de Xixón ente’l 23 d’abril y el 26 de mayu.
«La colección de discos de 78 rpm de la Biblioca d’Asturies algama más de 700 documentos estremaos y 900 exemplares, lo que fai d’ella la fonoteca de pizarra, especializada n’Asturies, más importante del mundu», despliquen dende la biblioteca pública. Ye precisamente esta «calidá y cantidá de la colección» la razón d’inaugurar esta esposición con motivu de la celebración ayeri del Día del Llibru y asina «aprovechar la ocasión pa difundir el patrimoniu asturianu y la so producción sonora». «Ye la primer ocasión na que les nuestres ayalgues más valioses, los discos de 78 rpm, pueden ver la lluz», comenten dende esta entidá que dende 1987 lleva conservando fondos de calter asturianu a traviés del Depósitu Llegal y compra en tiendes, anticuarios y espacios de segunda mano y coleccionistes.
Dientro d’esta colección fonográfica, la Biblioteca d’Asturies sorraya que la tonada, canción asturiana o asturianada, «tien llinguaxe musical propiu, un ámbitu xeográficu concretu, unes lletres escrites en llingua asturiana y, por too ello, conforma una seña d’identidá diferenciada». Concretatamente, califiquen a este xéneru llíricu y a la so forma d’interpretación como’l «más indentificativu de tola música asturiana».
La importancia de les grabaciones
«El gramófonu foi’l primer sistema de grabación y reproducción de soníu qu’usó un discu planu y dende’l rexistru de la so patente en 1887 convirtióse nel dispositivu más usáu pa reproducir el soníu grabáu, al menos hasta la década de 1950». Ye nestos discos de 78 rpm, tamién llamaos discos de pizarra, nos que munchos cantadores grabaron les sos obres, algamando asina «trespasar la llende del conocimientu llocal, aumentando’l so prestixu y permitiendo contratos, remuneraciones elevaes y xires internacionales». Amás, dende la Biblioteca d’Asturies añaden que «munches d’estes grabaciones sirvieron pa que los intérpretes que s’averaban a la tonada pudieran deprender de les grandes figures clásiques del xéneru».
Por esta doble trescendencia: importancia de la canción asturiana y del formatu de 78 rpm, esti organismu dependiente de la Conseyería de Cultura escoyó pa esta esposición una «amuesa representativa de los primeros rexistros sonoros conservaos de canción asturiana na primer metá del sieglu XX», presentando per primer vez al públicu «el trabayu de compilación de grabaciones sonores antigües feches nos últimos 30 años pola Biblioteca».
Suscríbite a les nuestres novedaes
