Esta mañana presentóse en rueda de prensa la programación d’Ente Fueyes, l’Ochobre Lliterariu qu’entama la Oficina de Normalización Llingüística de Xixón y la FMECyUP del Conceyu. El ciclu va durar del 6 al 31 del mes qu’entra y inclúi presentaciones lliteraries, cuentacuentos, talleres pa la reciella, mercáu artesanu y cuatro actividaes rellacionaes cola música’l país: los conciertos de Toli Morilla y La Bontuné; la interpretación del espectáculu Ser quien a cantar y l’alderique Miraes de muyer na música asturiana.
La programación de música n’asturianu entama’l martes 14 d’ochobre a les 19.30h, na sala de conferencies del Centru de Cultura Antiguu Institutu, cola interpretación de Ser quien a cantar. La escritora Sofía Castañón, la música Sara Friera, la fotógrafa y realizadora audiovisual Daniela Cohen y la percusionista Jimena Menéndez ponen el so arte nuna actuación «poética, musical y visual que reflexona sobre la ocupación del espaciu públicu per parte de les muyeres, siendo tamién un homenaxe a la xenealoxía que foi abriendo camín pa toes», como desplicó Castañón a MUSICASTURIANA.COM el pasáu mayu coincidiendo col estrenu del espectáculu. Nél «van poder sentise poemes, cantares y dalgo mui importante: les voces de muyeres como Nené Losada, Mari Luz Cristobal Caunedo o Yolanda Huergo. Referentes que ficieron y faen país».
El xueves 16 d’ochobre a les 19.30h el patiu del CCAI acueye un conciertu especial de La Bonturné, banda ganadora del XVI Premiu Camaretá al Meyor Cantar en Llingua Asturiana. Nél, el cuartetu bal-folk formáu por Merce Santos, Santi Caleya, David Varela y David Casillas va convertir caún de los sos temes nun pequeñu viaxe. Nesti sen, nun interpreten namás el so repertoriu, sinón que lu comparten col públicu presentando cada cantar, ilustrando los sos títulos y contestualizando los bailles que desendolquen. D’esta manera, la música vuélvese relatu, alcuentru y celebración.
El martes 21 na sala de conferencies del CCAI ye l’alderique entituláu Miraes de muyer na música asturiana nel qu’intervienen la cantadora d’asturianada Sandra Álvarez, la música de la escena tradicional y jazz Mapi Quintana y la profesora y panderetera Raquel Vega. Too ello con moderación de Claudia González, pianista y panderetera.
La programación musical d’Ente Fueyes zárrase’l 31 d’ochobre nel Teatru Xovellanos con Nueche d’insomniu. L’espectáculu de Toli Morilla. Esti formatu d’actuación ta integráu por un rellatu curtiu, representáu por un actor a mou de monólogu interior y una colección de nueve canciones interpretaes en vivo; too dividío en cuatro actos que presenten una reflexón sobre’l procesu creativu d’un autor exiliáu voluntariamente nuna casa solitaria d’un pueblín asturianu.
Antón Caamaño ye l’actor; Gloria Caamaño, Arancha Carcedo y Sara Méndez ponen los coros; José Meren el fagot y Toli Morilla la música y voz sobre unos testos lliterarios de Xulio Vixil, Mª Teresa González, Taresa Lorences, Xandru Fernández, Antón García, Mánfer de la Llera, Rosa Taurán. Un espectáculu que ye un resume perfecto de lo que quier tresmitir esti Ochobre Lliterariu amosando pallabra en munches de les sos formes.
Suscríbite a les nuestres novedaes
