El pasáu sábadu 12 d’abril el Llagar Lolina de Nava acoyó la 29 edición de la Nueche en Danza, una «xuntanza de xente pa baillar, tocar y cantar ensin más pretensión que la de pasalo bien», como presenten los y les responsables d’estos eventos. La cita foi tou un éxitu, con una participación mui alta y xente llegao dende oriente a occidente del país. Na canal de YouTube de Xosé Ambás pue vese un resume de cinco minutos de cómo foi’l desendolcu d’esta xuntanza que cuntó cola collaboración del Conceyu de Nava y el colectivu Amigos de San Bartolomé.
La primer edición del eventu foi en marzu de 2015 nel Centru Social de l’Asociación Cultural y de Vecinos de San Luis, en La Nueva (Llangréu). L’éxitu de la convocatoria fizo que la idea cuayare y la Nueche en danza fuere afitándose hasta llegar a cuasique trenta ediciones con cientos de danzantes revitalizando y dando puxu a la música y el baille tradicionales asturianos. Ye un tipu d’eventu qu’amuesa la evolución, l’espoxigue y la incorporación de xente nuevo al mundu del baille y música de raigañu.
Suscríbite a les nuestres novedaes
