El pasáu añu Llevólu’l Sumiciu llanzaron el so segundu EP, La Llobera, en formatu físicu. Agora esti vinilu n’edición especial pue mercase yá na tienda online de musicasturiana.com, na so oficina de Xixón y nel espaciu que tien na tienda de Puru Remangu n’Uviéu. Nun ye la única novedá rellacionada col grupu, porque esti sábadu van dar el primer conciertu que va cuntar cola collaboración de Neurora a les voces, cantante de dellos de los temes del grupu. L’escenariu va ser Museo Casa Botines Gaudí de Llión, dientro de la xornada GAUDÍ DIM 2026.
La Llobera ye’l segundu trabayu discográficu de Llevólu’l Sumiciu. El dúu d’electrónica de raigañu presenta nél cinco temes nos qu’hai composiciones propies, reellaboraciones de pieces tradicionales y unes influencies sonores que van dende l’asturianada y les vaqueires hasta’l dembow y los ritmos afrollatinos. Too ello col telón de fondu de la historia d’Ana María García ‘La Llobera’.
Nél rescampla una madurez del so soníu, una propuesta más rítmica y la inclusión per primer vez de composiciones orixinales dafechu nos cortes ‘Nacida de la bruma’. Esti tema tien dos partes -qu’abren y piesllen l’EP- y nél pon voz y lletra Neurora, cantante que yá collaborara con ellos nel tema ‘Ronzón’. Tamién suena sampleada la voz del cantador de tonada Juanín de Mieres (1905-2003) en ‘Mio madre como era probe’.
Otra de les novedaes ye que tamién ye un álbum conceptual. El puntu d’alcuentru ye la lleenda d’Ana María García ‘La Llobera’, llanisca xulgada doblemente nel sieglu XVII: pola inquisición y pola sociedá, que nun aceptaba qu’una muyer quixere ser llibre, tamién no tocante a l’amor. D’esta manera, Llevólu’l Sumiciu escoyeron temes de los yá teníen fechos que pudieren rellacionase con esta historia y les lletres de ‘Nacida de la bruma’ traten esta cuestión, incluyendo amás pasaxes del cómic Ana María. La llobera d’Asturies, obra cola que Guillermo Menéndez Quirós algamó’l Premiu Alfonso Iglesias de Cómic en 2022.
Tres d’actuar el sábadu pasáu nel Válgame Fest, el dúu d’electrónica de raigañu tien la so próxima parada esti sábadu en Llión, dientro de GAUDÍ DIM 2026, una xornada cultural abierta que va tresformar l’entornu del Museo Casa Botines Gaudí nun espaciu de música, arte y creación contemporánea col motivu del Día Internacional de los Museos y del Añu Guadí 2026.
Ellí Llevólu’l Sumiciu va estrenar un show audiovisual creáu específicamente pa esta xornada. Nél, el dúu conviértese nun tríu gracies a la participación de Neurora, cantante que pon voz a dellos de los sos temes. D’esta manera música electrónica, actitú punk y música de raigañu suenen enriba l’escenariu mientres les realizaciones audiovisuales del grupu van proyectase enriba la muralla asitiada xunto al muséu. La intención del dúu ye poder repetir esti formatu en tríu n’actuaciones futures.
Suscríbite a les nuestres novedaes
